सोलुखुम्बु ।  फाप्लु–रिङ्मु–टाक्सिन्दु हुँदै खुम्बुपासाङल्हामु गाउँपालिका जोड्ने सडकको कालोपत्रे सुरु भएको छ ।  आगामी २ वर्ष भित्र सम्पन्न गर्ने गरी बानियाँ निमार्ण व्यवसायी कम्पनीले १० किलोमिटर सडकको कालोपत्रे गर्नका लागि गत मंसिर २ गते भ्याटसहित ३७ करोड २८ लाख ७६ हजार ७ सय ५० रुपैयामा सम्झौता गरेको थियो । उक्त सडकका लागि एयियाली विकास बैंक (एडिबी) को सहयोगमा निमार्ण गरिने बताइएको छ ।
नेपाली कांग्रेसका केन्द्रीय सदस्य एवं पर्यटन विभाग प्रमुख आङगेलु शेर्पाको प्रमुख उपस्थितिमा उक्त सडकको शिलान्यास गरिएको हो । कार्यक्रमलाई सम्बोधन गर्दै शेर्पाले सडक निर्माणबाट पर्यटनका लागि ठुलो सहयोग पुग्ने बताउनुभयो । साथै माथिल्लो भेगमा समानको समेत घट्ने भएकाले यस सडकलाई महत्वपूर्ण सडक मानिएको बताउनुभयो ।
यस्तै सोलुदुधकुण्ड नगरप्रमुख नाम्गेलजाङ्बु शेर्पाले यस सडकले नगरपालिका मात्र नभइ माप्यदुधकोशी गाउँपालिका र खुम्बुपासाङल्हामु गाउँपालिका बासीलाई समेत फाइदा हुने बताउनुभयो । निरन्तरको प्रयास पछि सडकको कालो पत्रे गर्न शिलान्यास गर्न पाउदा आफू अत्यन्तै हर्षित भएको उहाँको भनाइ रहको छ ।
नगर उपप्रमुख गान्धीमाया तामाङले आगामी दिनमा निमार्ण व्यवसायीले आफूले गरेको प्रतिवद्धता अनुसार काम गर्नु पर्ने बताउनुभयो । साथै निमार्ण व्यवसायीलाई अप्ठारो परेको खण्डमा जुनसुकै बेलामा सहयोग गर्न तयार रहेको बताउनुभयो । निमार्ण व्यवसायीका तर्फबाट बोल्दै उद्धव न्यौपानेले समयमा नै काम सम्पन्न गरेर हस्तान्तरण गर्ने प्रतिवद्धता जनाउनु भएको छ ।