किशोर शर्मा, काठमाडौं । नेपाली कांग्रेसका सभापति शेरबहादुर देउवाले केन्द्रीय उद्योग तथा व्यापार विभागका सदस्यहरूलाई प्रमाणपत्र प्रदान गर्नुभएको छ । मंगलबार बुढानिलकण्ठस्थित निवासमा सभापति देउवाद्वारा विभागका सदस्यहरूलाई प्रमाणपत्र प्रदान गरिएको विभागका प्रमुख चिनकाजी श्रेष्ठले बताउनुभयो ।
सभापति देउवाले पुस १६ गते १० जना विभिन्न उद्योग तथा व्यापारमा संलग्न रहेका विज्ञहरूलाई सदस्यमा मनोनीत गर्नुभएको थियोे । सदस्यहरूले मनोनयनको प्रमाणपत्र प्राप्त गरेपछि विभागको पहिलो बैठक पनि आजै बसेको छ ।
विभागको वैठकले सातै प्रदेशका उद्योगी व्यवसायीहरूबीच अन्तरक्रियात्मक कार्यक्रम गर्ने निर्णय गरेको प्रमुख श्रेष्ठले बताउनुभयो । यसबाट आम उद्योगी व्यवसायीहरुका समस्या पहिचान हुने र उक्त समस्या समाधानका लागि नेपाली कांग्रेसले राजनीतिक भूमिका निर्वाह गर्ने बताइएको छ।
विभागका सदस्यहरूमा विश्व हिन्दु महासंघका अन्तर्राष्ट्रिय महासचिव समेत रहनुभएका सोलुखुम्बुका युवा नेता शम्भुहरि बास्तोला, कञ्चनपुरका खगेश्वर बोहरा, जुम्लाका मानबहादुर भण्डारी, काठमाडौंका ध्रुवबहादुर खड्का, काठमाडौंका राजीव श्रेष्ठ, कपिलवस्तुका जमसेर अलि मियाँ, झापाका संजीज घिमिरे, काभ्रेपलाञ्चोकका सीताराम परियार, लमजुङकी जुनु गुरुङ र रौतहटका इञ्जिनियर विजयकुमार सिंह रहनुभएको छ ।
