काभ्रे । जिल्ला समन्वय समिति, काभ्रेपलाञ्चोकका प्रमुख दीपक गौतम थुनामा परेपछि बिहीबारदेखि धुलिखेलमा हुन लागेको विश्व युवा सम्मेलन महोत्सव स्थगित भएको छ । जिससले धुलिखेलस्थित काठमाडौं विश्वविद्यालयमा कार्यक्रम आयोजना गर्न लागेको  थियो । सम्मेलनमा विभिन्न देशबाट युवाहरू आएका थिए ।
कार्यक्रमको अघिल्लो दिन गौतम चेक बाउन्ससम्बन्धी मुद्दामा काठमाडौंमा पक्राउ परेका छन्। उनलाई प्रहरी वृत्त वानेश्वरले थुनामा राखी कारबाही अघि बढाएको छ । उनले एक व्यक्तिलाई सात लाखको चेक दिएकोमा नसाटिएपछि ती व्यक्ति प्रहरीमा पुगेका हुन् । पक्राउ परेपछि गौतमले पैसा तिर्ने बताएका छन् । जसअनुसार बिहीबार मिलापत्र भएर उनी छुट्ने सम्भावना छ । तर, अन्य व्यक्तिले पनि चेक बाउन्स मुद्दा दर्ता गर्ने सम्भावना रहेको बताइन्छ । जिल्ला समन्वय प्रमुख गौतम नेकपा(एकीकृत समाजवादी)का नेता हुन्।