सोलुखुम्बु । सोलुखुम्बु जिल्लाको प्रसिद्ध धार्मिक तिर्थस्थल दुधकुण्ड जाने पदमार्ग निर्माण कार्य तिव्र रुपमा भइरहेको छ । जिल्लाको सोलुदुधुकण्ड नगरपालिका वडा नं. १ स्थित प्रसिद्ध धार्मिक-पर्यटकीय स्थल दूधकुण्ड पोखरी क्षेत्रमा निर्माण गरिएको पदमार्गको काम तिव्र भइरहेको हो । सनातन ॐकारपरिवारका (हिन्दु, बौद्ध, किराँत, जैन, वोन, प्रकृतिपूजक आदि) धर्मवलम्बीहरूको साझा आस्थाको केन्द्र दूधकुण्ड पोखरी क्षेत्रमा सोलुदूधकुण्ड नगरपालिकाको समन्वयमा पर्यटकीय संरचनाहरू धमाधम निर्माण भइरहेको नगरप्रमुख नाम्गेल जाङ्बु शेर्पाले बताउनुभयो ।
देश-विदेशका पर्यटक तथा तीर्थयात्रीहरूलाई सो पदमार्गले हिमालको नजिक पुग्न तथा यात्रालाई सहज र रमाइलो बनाउने मेयर शेर्पाले बताउनुभयो । उहाँले भन्नुभयो ‘दुधकुण्ड धार्मिक, सांस्कृतिक महत्त्वको साथै प्राकृतिक सौन्दर्यको एक अद्भुत मिश्रण भएकाले यसको पवित्रतालाई अनुभव गर्न र यहाँको शान्त वातावरणमा हराउन अब यात्रा थप सरल, आकर्षक र रोमाञ्चक हुनेछ ।’ यो पोखरी समुन्द्री सतहबाट ४ हजार ५ सय ६० मिटर उचाइमा अवस्थित छ ।