काठमाडौं । गैरआवासिय नेपाली संघ (एनआरएनए) उच्चस्तरीय समितिले संघको एकता महाधिवेशन गराउन तीन सदस्यीय निर्वाचन आयोग गठन गरेको छ । सर्वोच्च अदालतको परमादेशअनुसार एनआरएनएको एकता महाधिवेशन गराउन गठित उच्चस्तरीय समितिले वरिष्ठ अधिवक्ता गोपालकृष्ण घिमिरेको नेतृत्वमा आयोग गठन गरेको हो ।
घिमिरे प्रमुख निर्वाचन आयुक्त रहेको समितिमा सेवानिवृत्त मेजर डमर घले तथा अधिवक्ता आशीष उप्रेती निर्वाचन आयुक्त रहेका छन् । नेपालको कानुनी क्षेत्रमा लामो अनुभव हासिल गरेका वरिष्ठ अधिवक्ता घिमिरे डेमोक्र्याटिक लयर्स एसोसियसनका पूर्वअध्यक्ष हुन् भने ब्रिटिस सेनाको ब्रिगेड अफ गोर्खाजका अवकाश प्राप्त मेजर डमर घले एनआरएनए युकेका पूर्वअध्यक्ष हुन् । बेलायतमा बसोबास गर्ने उनले हाल पोखरामा आफ्नै होटेल व्यवसाय सञ्चालन गरिरहेका छन् । त्यस्तै, अधिवक्ता उप्रेती युवा कानुन व्यवसायी हुन् ।
लामो समयदेखि विवादमा अल्झिएको गैरआवासीय नेपाली संघलाई एकताबद्ध गरी महाधिवेशन गराउन सर्वोच्च अदालतको परमादेशअनुरूप परराष्ट्र मन्त्रालयसँग समन्वय गरी आउँदो मे ३–५, २०२५ मा काठमाडौंमा एकताको महाधिवेशन गर्न लागिएको हो ।

संस्थाको लोकतान्त्रीकरण तथा सम्पूर्ण सदस्यहरूलाई अधिकार सम्पन्न गर्ने गरी निष्पक्ष र पारदर्शीरूपमा निर्वाचन सम्पन्न गराउन यो निर्वाचन समितिलाई सहयोग गर्न उच्चस्तरीय समितिका अध्यक्ष डा शेष घलेले आग्रह समेत गरेका छन् । यस्तै, उच्चस्तरीय समितिले यही ३१ मार्च २०२५ भित्र नयाँ सदस्यताको लागि आवेदन दिन वा आफ्नो सदस्यता नवीकरण गराउन पनि आग्रह गरेको छ ।
यसैगरी समितिले एनआरएनएका सबै पुँजीकृत सदस्यहरूले काठमाडौंमा उपस्थित भएर तोकिएको शुल्क तिरी डेलिगेट्स बन्न पाउने व्यवस्था गरिएको जनाएको छ ।