काठमाडौं । नेपाल कम्युनिष्ट पार्टी नेकपाका महासचिव नेत्रविक्रम चन्द र नेता धर्मेन्द्र बास्तोलाले माओवादी केन्द्रका अध्यक्ष पुष्पकमल दाहाल र एमाले वरिष्ठनेता माधवकुमार नेपालसँग एकसाथ भेटवार्ता गरेका छन् । कोटेश्वरमा दाहाल, नेपाल र चन्द, बास्तोला बीच भेटवार्ता भएको हो । चारजना नेताले नै भेटवार्तापछि संयुक्त फोटो समेत खिचेर सार्वजनिक गरेका छन् ।

चन्दसँग भएको भेटबारे माधवकुमार नेपालले सुरुमा आफ्नो फेसबुकमार्फत सार्वजनिक गरेका थिए । यसअघि हिजो चन्दले माओवादी केन्द्रका अध्यक्ष पुष्पकमल दाहालसँग खुमलटार नै पुगेर भेटवार्ता गरेका थिए । जहाँ उनले बिरामी परेकी दाहालपत्नी सीतासँग ‘भाउजु’ भन्दै कुराकानी गरेका थिए ।